Место за фудбалски аџилак

Пехарот од Светското првенство, златниот медал на Франц Бекенбауер од 1990 година, копачката на Герд Милер од 1974 година, кога беше прогласен за најдобар стрелец и топка потпишана од оние кои се заслужни за „чудото од Берн“ од 1954 година. Со предметите кои имаат големо значење во германската фудбалска историја во Дортмунд во петокот (4.04) беше „осветен“ Фудбалскиот музеј.

Претседателот на Германскиот фудбалски сојуз (ДФБ), Волфганг Нирсбах, им се заблагодари на сите кои учествуваат во градењето на музејот, местото кое треба да биде „дом на германската фудбалска историја“.

Пред околу 200 гости од политиката и спортот, министерката за спорт на покраината Северна Рајна Вестфалија, Уте Шефер, рече: „Овде, во Северна Рајна Вестфалија фудбалот се сака и за него се живее.“ Министерката е убедена дека проектот ќе биде успешен. „Музејот ќе биде магнет за гости од цела Германија“, рече таа.

Покраината Северна Рајна Вестфалија учествува со вкупно 18,5 милиони евра во изградбата на музејот, додека ДФБ дава 7,5 милиони евра. Десет милиони евра доаѓаат од спонзори, како Адидас и Мерцедес. Музејот се простира на површина од 7700 метри квадратни.