Меркел и ЕК го критикуваат тврдиот курс на Ердоган

Демонстрациите се дел од правната држава и со учесниците на протестите мора да се постапува во духот на правната демократија, изјави германската канцеларка Ангела Меркел која денеска (07.06.2013) во Берлин го прими тунискиот премиер Али Ларајед. Таа укажа на признанието на турскиот претседател Абдула Ѓул за постоење проблеми:

„Сметам дека токму со младите треба да се дискутира за проблемите во земјата и дека не треба да се употребува сила против демонстрантите“, изјави Меркел.

Филе со критики на сметка на Турција

Турција треба да спроведе истрага дали полицијата употребила прекумерна сила при задушувањето на антивладините протести во земјата и да побара казна за одговорните лица, изјави денеска еврокомесарот за проширување, Штефан Филе.

„Мирните протести претставуваат легитимен начин на кој група луѓе можe да ги изрази своите ставови во едно демократско општество. Прекумерната употреба на сила од страна на полицијата врз демонстрантите нема место во една демократија“, нагласи Филе во обраќање за време на конференција на која присуствуваше и турскиот премиер Реџеп Таип Ердоган.

Филе изрази задоволство што турската Влада го призна тоа, нагласувајќи дека сега е важно да се спроведе итна и транспарентна истрага и виновниците да сносат одговорност. Еврокомесарот за проширување Штефан Филе, кој учествува на дводневна конференција во Истанбул се сретнал со претставници на турски граѓански организации, вклучително и со демонстрантите.