Масовни протести против уништувањето на хемиското оружје во Албанија

Масовни протести против уништувањето на сириското хемиско оружје во Албанија се одржаа денеска во Тирана и во други албански градови. Во организација на невладини организации, на протестите е побарано владата на Еди Рама да ги прекине преговорите со САД за уништување на хемиското оружје.

Во меѓувреме, претседателот на најголемата опозициска партија, Демократската партија на Албанија, Љуљзим Баша побара премиерот Рама да каже „не“ на барањата хемиското оружје да се уништува во Албанија. Тој побара да биде распишан референдум, ако Владата се согласи со барањето на САД.

Во Тирана расте бројот на луѓето кои се приклучуваат на протестите, а Владата побара од опозицијата да не провоцира протести со политичка конотација. Владини извори наведуваат дека во текот на 24 часа ќе се соопшти конечниот став на Тирана за уништувањето на оружјето - дали ќе се случи во Албанија или не.

Група невладини организации, со гас маски протестираа и пред албанската амбасада во Скопје. Со слоганот: „Да му кажеме НЕ на хемиското оружје“ тие ги поддржаа граѓаните во Албанија и порачаа дека тоа ќе значи уништување на здравјето на луѓето и во Македонија.