Македонски „леопарди“ во Авганистан

Денеска од тетовската воена касарна замина новиот контингент на Армијата на Република Македонија во мировната мисија „ИСАФ“ во Авганистан со 148 војници од единицата „леопарди“.

Во оваа 12-тата ротација АРМ учествува со механизирана пешадиска чета во рамки на контингентот на Велика Британија. Искусните „леопарди“ на македонската војска во наредниве 6 месеци ќе бидат распоредени во главната команда на мисијата „ИСАФ“ во Кабул, каде што ќе бидат задолжени за обезбедувањето на таа команда. Мировниците на АРМ во Кабул ќе извршуваат и други сложени задачи: патролирање и обезбедување на воената база и објекти од значење за животот на населението во таа држава, борбено обезбедување на комуникации и други задачи.

„Веќе ги знаеме предизвиците што не чекаат и сме подготвени на нив“

Командантот на најновиот контингент Мухарем Мухареми изјави: „Во 2009 година бев првпат во оваа мисија како штабен офицер и имам одредени искуства од теренот во Авганистан. Меѓу нас има војници и офицери, кои веќе учествувале по 2-3 пати во таквата мисија во рамките на контингентите од изминатите неколку години. И овојпат јас и сите ние сме свесни и запознати со предизвиците, кои не очекуваат таму“.

Една од четирите припаднички на женскиот пол, облечени во новите униформи на македонските миротворци во Авганистан, е и Емилија Анастасовска. Таа заминува за првпат во ваква опасна мисија, но, сепак, самоуверено напоменува: „Постои едно непишано правило: штом ќе се облече униформа, тогаш сме сите исти и сите рамноправни, без разлика дали се работи за маж, или жена.“

Десетарот на АРМ Томислав Несторовски пред заминувањето на должноста во Авганистан денеска рече: „Таму бев во 2010 година и ги знаеме предизвиците, со кои ќе се соочиме. Здобивме и дополнителна подготовка за ситуациите на теренот низ обуките овде во изминативе недели.“

Подофицерот на АРМ Кенан Незири во 2007 година имал прво учество во мировна мисија на АРМ и тоа во „Слобода за Ирак“. Пред да замине во својата втора мировна мисија, овојпат во Авганистан, тој посочи: „Мировните мисии во Ирак и во Авганистан се слични, оти и населението таму има слични убедувања. Нашите војници досега се одликувани со медани за заслуги и имаат добиено други признанија, поради тоа што покажуваат дека се рамноправни со војниците од другите национални контингенти на НАТО.“

Автор: Свето Тоевски

Редактор: Александра Трајковска