Македонија преслаба за Шпанија

Домаќинот поведе со голот од пенал на Серхио Рамос во 16. минута, а веднаш потоа дебитантот во шпанската репрезентација Пако Алкасер во 17.минута зголеми на 2:0. Македонија намали на 2:1 со голот од пенал што го постигна Агим Ибраими во 28. минута, но во финишот на првиот дел Серхио Бускетс, во третата минута од продолжението на првото полувреме, го постигна својот првенец во дресот на Шпанија. На стартот на вториот дел мрежата на Томе Пачовски ја затресе Давид Силва – 50. минута, додека конечните 5:1 ги постави Педро во првата минута од продолжението на второто полувреме.

Вкупно девет натпревари беа одиграни синоќа од 1.коло од квалификациите за ЕУРО 2016 што ќе се одржи во Франција.

Важна победа во борба за првото место против директниот конкурент во групата постигна Англија совладувајќи ја Швајцарија на гости со 2:0, со двата гола на Дени Велбек.

Преглед на резултатите на синоќа одиграните натпревари:

Ц група: Шпанија – Македонија 5:1, Украина – Словачка 0:1, Луксембург – Белорусија 1:1.

Е група: Естонија – Словенија 1:0, Сан Марино – Литванија 0:2, Швајцарија – Англија 0:2.

Г група: Русија – Лихтенштајн 4:0, Австрија – Шведска 1:1 и Црна Гора – Молдавија 2:0.

Вечерва се играат натпреварите од преостанатите групи, а двојките се: Казахстан –Летонија, Чешка – Холандија, Исланд – Турција (А група), Андора – Велс, Босна и Херцеговина – Кипар, Израел – Белгија (Б група), Азербејџан – Бугарија, Хрватска – Малта и Норвешка – Италија (Х група).