Крвопролевањето во Газа не запира

Три недели по почетокот на воената операција, израелските напади во Газа продолжуваат со несмалена жестокост. Во напад врз едно училште на организацијата на ОН - УНРВА, сместено во бегалски камп во Џабалија, денеска загинаа најмалку 16 лица, соопшти портпарол на палестинските спасувачки екипи. Во палестинските медиуми се зборува за 20 и повеќе загинати. Во тој дел на Газа, кој и онака важи за пренаселен, владее уште поголема турканица, со оглед на тоа што десетици илјади Палестинци од другите делови на енклавата таму бараат засолниште од израелските напади. Портпаролот на УНРВА, Крис Гунеш, соопшти дека во нападот загинале и петмина соработници на ОН, од кои тројца наставници кои работеле за организацијата.

Портпаролка на израелската армија изјави дека привремената истрага на инцидентот покажала дека милитантни Палестинци во околина на училиштето испалиле гранати врз израелските војници. Трупите возвратиле на огнот, тврди таа.

Досега засолниште во училиштата на ОН побараа повеќе од 200.000 Палестинци.

Од почетокот на израелската воена офанзива на 8. јули, според последните податоци од Министерството за здравство, загинаа 1283 луѓе, а повредени се околу 7200.

Инаку, нападите на милитантните Палестинци врз Израел продолжуваат и денеска (30.07). Воениот шеф на Хамас, Мохамед Деиф, кој дејствува од илегала, во аудио порака пренесена вчера преку една телевизија на Хамас, рече дека прекин на огнот е можен под услов да запре израелската офанзива.