Кои ќе бидат новите германски министри?

Најголемото изненадување се навестува во Министерството за одбрана. Според германските медиуми, досегашната министерка за труд и социјала Урсула фон дер Лајен треба да биде првата жена која ќе застане на чело на ова министерство. Оваа 55-годишна политичарка од ЦДУ во Министерството на одбрана ќе го замени сопартиецот Томас де Мезие, кој се враќа во ресорот внатрешни работи, се вели од Берлин.

Официјално ЦДУ, ЦСУ и СПД имињата на идните министри ќе ги објават денеска (15.12.). Откако базата на Социјалдемократската партија се изјасни позитивно за големата коалиција, од партиите прво ја објавија распределбата на министерствата. ЦДУ ја зазема канцеларската функција со Ангела Меркел и ќе раководи со министерствата за внатрешни работи, финансии, одбрана, здравство и образование. Волфганг Шојбле останува министер за финансии. Според информации на „Рајнише пост“ и „Шпигел онлајн“ актуелниот генерален секретар на ЦДУ Херман Грее ќе биде новиот министер за здравство. Засега е отворено дали министерката за образование Јохана Ванка ќе остане на функцијата.

Тројца министри од ЦСУ

Баварската Христијанско-социјална унија (ЦСУ) ќе добие три министерства. Нов министер за сообраќај и дигитална инфраструктура треба да биде актуелниот генерален секретар на ЦСУ, Александер Добринт. Досегашниот министер за сообраќај Петер Рамзауер го напушта кабинетот, јавува весникот „Билд ам зонтаг“. Министерот за внатрешни работи Ханс Петер Фридрих ќе го преземе ресорот земјоделство. Засега е отворено кој ќе го води Министерството за развојна помош.

Се смета дека распределбата на министерствата во СПД е завршена: Како вицеканцелар и „суперминистер“ за економија и енергија во кабинетот ќе седне шефот на партијата, Зигмар Габриел. Шефот на пратеничката група Франк Валтер Штајнмаер треба да раководи со Министерството за надворешни работи, благајникот на СПД Барбара Хендрикс го презема ресорот екологија, додека генералниот секретар на СПД, Андреа Налес ќе го преземе Министерството за труд и социјала. Заменик шефот на СПД Мануела Швезик исто така ќе биде дел од новиот кабинет на Меркел, таа ќе го преземе Министерството за семејство. Со ресорот правда пак ќе раководи досегашниот покраински министер за стопанство во Заарланд, Хајко Мас.

Со заменикот претседател на СПД Ајдан Озогуз, според информации од германската новинска агенција, за првпат во историјата на Германија, жена со турско потекло ќе заземе место во владата. Озогуз треба да стане државен секретар за миграција, бегалци и интеграција.

Речиси 76 проценти од базата на СПД се изјаснија за формирање на коалициона влада со ЦДУ и ЦСУ. На внатре-партиското гласање учествуваа 369.680 членови односно 77,86 проценти од 474.820 социјалдемократи со право на глас. Околу 32.000 гласачки ливчиња беа неважечки, додека 23,95 проценти од членовите гласаа против големата коалиција. Претседателот на партијата Зигмар Габриел при објавувањето на резултатите во Берлин изјаснувањето на базата го нарече „празник за внатре-партиската демократија“. Претседателот на ЦДУ и канцелар Анегела Меркел му честиташе на Габриел. Таа порача дека се радува на соработката во коалицијата. Во вторник Унијата и СПД во Бундестагот по третпат треба да ја изберат Ангела Меркел за канцелар на Германија.