Италија како претседавач со ЕУ во борба против невработеноста на младите

Италија денеска го презема ротациското претседателство со ЕУ, откако тоа во првите шест месеци од 2014 година и‘ беше доверено на Грција, наведуваат италијанските весници „Кориере дела сера“ и „Стампа“.

Во следните шест месеци премиерот Матео Ренци ќе го искористи италијанското претседателство со ЕУ за да ја мобилизира Унијата за борба против невработеноста кај младите, а ќе работи и на две други основни прашања битни за ЕУ - економскиот раст и проблематиката со нелегалната имиграција.

По повод преземањето на претседателството со Унијата, премиерот Ренци подвлече дека овие шест месеци Италија ќе се погрижи да ги убеди младите луѓе дека ЕУ е унија од држави во кои луѓето може да имаат надеж.

Италијанското претседателство со ЕУ ќе мине во знакот на штедење. Рим предвидува за него да потроши 68 милиони евра. Тоа е многу помалку во споредба со 170-те милиони, што Париз ги потроши за време на последното француско претседателство.

За време на италијанското претседателство со ЕУ ќе почне да заседава новиот Европски парламент и ќе се изберат водечките политички фигури во ЕУ - претседателот на ЕП, претседателот на Европскиот совет, претседателот на ЕК, првиот дипломат на ЕУ и европските комесари.