Израелските преговарачи се вратија во Каиро

Израелските преговарачи денеска се вратија во Каиро на разговори за ставање крај на едномесечните воени судири во Газа. Новото 72-часовно примирје се чини дека го почитуваат двете страни – и вооружените Палестинци и израелската војска.

Израелската војска соопшти дека една ракета била испукана кон околината на Тел Авив на еден час пред вчера да стапи на сила примирјето. Повеќе други ракети завршиле во морето. Хамас информираше дека ракетите биле испукани од палестинска страна. Израел ги услови натамошните разговори со почитување на примирјето. Неговата делегација во пред неколку дена ги напушти разговорите во Каиро, поради непочитување од палестинска страна на претходното примирје.

Во ексклузивното интервју за агенцијата „Франс прес“, кое лидерот на Хамас, Халед Мешаал го даде синоќа во катарската престолнина Доха, каде всушност и живее, тој изјави дека вчера договореното ново 72-часовно примирје „е едно од средствата или тактиките, наменети за постигнување успех во преговорите или за доставување хуманитарна помош“.

Истовремено, тој подвлече дека привремената спогодба треба да е прилагодена кон едно трајно примирје, кое ќе ги задоволи палестинските барања, вклучувајќи го и она за кревање на блокадата на Појасот Газа.

„Меѓутоа, доколку Израел ја продолжи својата агресија, Хамас и останатите палестински фракции се подготвени да дадат отпор како на борбеното поле, така и на политички план“, предупреди Мешаал.