Изненадувачки избор на Јоахим Лев

Најголемо изненадување е неповикувањето на некогаш првиот напаѓач на репрезентацијата Марио Гомез, како и на двајцата резервни голмани Рене Адлер и Марк- Андре Тер Стеген. Гомез подолго време го мачат повреди и сезонава не успеа да избори стандардно место во тимот на Фиорентина.

Провизорниот тим на Лев опфаќа 30 играчи, но нивниот број ќе биде намален на 25 по пријателскиот меч со Португалија следната недела. Конечниот тим од 23 играчи треба да биде дефиниран до 2. јуни.

Трикратниот светски првак Германија е во група со Португалија, Гана и САД.

На прес-конференцијата Лев изјави дека пресуден критериум при изборот на играчите биле „формата и физичката подготвеност на играчите“. И покрај тоа, во тимот се повикани двајца играчи- Сами Кедира и Мирослав Клозе, кои веќе подолг период се повредени и не настапуваат за своите клубови. Лев рече дека повикот за Кедира е резултат на „неговата личност и искуство“.

На голманските позиции повикани се Мануел Нојер (Бајерн М.), Роман Вајденфелер (Борусија Д.) и Рон- Роберт Цилер (Хановер).

Во одбраната за настап на СП ќе конкурираат: Жером Боатенг (Бајерн М.), Филип Лам (Бајерн М.), Ерик Дурм (Борусија Д.), Кевин Гроскројц (Борусија Д.), Марсел Шмелцер (Борусија Д.), Матс Хумелс (Борусија Д.), Бенедикт Ховедес (Шалке), Марсел Јансен (Хамбург), Пер Мертезакер (Арсенал), Шкодран Мустафи (Сампдорија).

Во средниот ред повикани се дури 15 играчи, меѓу нив и неколку изненадувања како младите Макс Мајер и Леон Горецка од Шалке, Андре Хан од Аугсбург и Матијас Гинтер од Фрајбург. Останатите избраници на Лев се со подолго искуство во тимот: Ларс Бендер (Бајер Л.), Јулијан Дракслер (Шалке), Марио Геце, Бастијан Швајнштајгер, Тони Крос, Томас Милер (Бајерн М.), Сами Кедира (Р. Мадрид), Месут Езил и Лукас Подолски (Арсенал), Марко Ројс (Борусија Д.), Андре Шурле (Челзи).

Германскиот селектор се одлучи да повика само двајца класични напаѓачи на подготовките, покрај ветеранот Мирослав Клозе од Лацио, шанса да импресионира ќе има и младиот Кевин Фоланд од Хофенхајм.