Загубен контакт со уште еден тим на ОБСЕ во источна Украина

Врската со тимот набљудувачи на ОБСЕ се прекинала вчеравечер (29.05) околу 19 часот, соопшти денеска Организацијата за безбедност и соработка во Европа (ОБСЕ). Тимот бил запрен во градот Северодоњецк, на оддалеченост од околу 100 километри од Луганск во источна Украина.

Трага се‘ уште нема ниту од тимот набљудувачи кои исчезнаа во понеделникот (26.05). Лидерот на проруските сепаратисти Алексеј Чмиленко од Луганск за агенцијата Интерфакс изјави дека четворицата набљудувачи се ослободени. Тие биле предупредени и од нив било побарано да не се задржуваат во регионот без претходна најава.

Во меѓувреме, министерот за одбрана на прозападната украинска влада во Киев, Михаил Ковал, најави дека „антитерористичката операција“ против проруските сепаратисти продолжува и дека ќе заврши тогаш кога состојбата ќе биде целосно стабилизирана. Целта на операцијата е целосно ослободување на источна Украина од бунтовниците и повторно воспоставување украински структури. Ковал пред новинарите во Киев изјави дека милициите се „целосно“ протерани од делови на источна Украина. Делови од регионот Доњецк, како и северот на регионот Луганск, се под контрола на украинската армија, се тврди во Киев.