Жртви од свински грип во Хрватска и БиХ

Педесетгодишен човек од околината на Загреб денеска почина во загрепската болница за инфективни болести од компликации предизвикани од свински грип и тој е втора жртва годинава од вирусот Х1Н1 во Хрватска. Уште пет лица се хоспитализирани поради зараза од вирусот на новиот грип и се наоѓаат во критична состојба. Во болницата во Сараево пак почина шеесет и петгодишен пациент заразен со вирусот Х1Н1.

Последните неколку денови во Клиничкиот центар на Универзитетот во Сараево било потврдено присуството на вирусот на грипот Х1Н1. Присуството на вирусот било потврдено кај двајца пациенти. Во Германија со почетокот на новата година расте бројот на лица заразени од вирусот нс свински грип. Едно тригодишно девојче и еден 51-годишен маж деновиве починаа од болеста.

Вирусот Х1Н1 се појави во 2009 година и предизвика пандемија, позната како свински грип. Лани од грипот, предизвикан од вирусот Х1Н1 заболеа 60.000 луѓе,а умреа 58 лица. Во институтот Роберт Кох во Берлин истакнуваат дека актуелната состојба не може да се спореди со онаа во 2009 година.

Автор: СН/ЖА/миа/бета/дпа

Редактор: Жана Ацеска