Европа и‘ завидува на Германија?

Се работи за рекордна бројка со симболична вредност. За прв пат во историјата германскиот извоз ја мина границата од илјада милијарди евра. 1.075 милијарди евра – оваа вредност не беше достигната ни во 2008-ма, годината на големиот раст.

Во исто време, Германија годинава увезла стока во вредност од 919 милијарди евра. Тоа е повеќе од минатите години, но на крајот Германија сепак има суфицит од 156 милијарди евра.

Во странство ваковиот успех наидува на критики. Германија е обвинета дека нејзината економија расте на сметка на нејзините европски соседи. Претседателот на Сојузното здружение за надворешна и трговија на големо, Антон Бернер ваквите наводи ги оценува како апсурдни.

„Ваквите суфицити не биле, ниту сега се цел на германската политика. Пазарно-економските закони важат за сите земји и нив не ги постави Германија“, тврди Бернер.

Германија и натаму силна во странство

Германија е економски најсилна земја во Европа. Ниту следните години се чини дека нема тоа многу да се промени. Бернер смета со ист плус во конечната пресметка. И покрај ослабнувањето на светската економија, извозот во 2012-та би требало да порасне на 1.134 милијарди евра. Увозот во исто време би бил зголемен за седум проценти – на 983 милијарди евра.

Глобалните мега трендови останаа неизменети. Земјите во развој и натаму се во трка, со која паралелно оди и огромниот развој на населението.

„Според нашите проценки, пазарите во земјите во развој речиси и да не се оптоварени со должничката криза и тие и понатаму интензивно инвестираат во технологиите на иднината“, вели претседателот на Сојузното здружение за надворешна и трговија на големо.

Сето тоа, смета Бернер, поттикнува масовни инвестиции, меѓу кои се оние во технологијата за развој на ефикасно искористување на енергијата и суровините во сообраќајната, градежната и телекомуникациската инфраструктура. А, ваков тренд не се случува само во Бразил, Русија, Индија и Кина, туку и во земјите во развој од втор ред, како што се Индонезија, Бангладеш, Саудиска Арабија и Кувајт, земјите од западна Африка богати со суровини, како и Перу и Еквадор во Јужна Америка.

Земјите од ЕУ најважни трговски партнери

И покрај се’ земјите од ЕУ се и ќе останат најважни трговски партнери на Германија. Околу 60 проценти од германскиот извоз завршува во тие земји. Затоа и не е чудно што европската должничка криза е голема тема и во салите за состаноци на Сојузното здружение за надворешна и трговија на големо. Доколку се појави проблем со државните финансии во европските земји, тогаш пропаѓаат и германските економски планови за следната година. Поради тоа е апсолутно нужно должничката криза да се стави под контрола.

„Фактот дека имаме голема корист од еврото не значи дека треба да се согласиме и на секаква политичка трговија, само за да се спаси заедничката валута“, предупредува Антон Бернер.

Според негово мислење, Германија во никој случај не смее да попушти под се’ поголемиот притисок да се распредели одговорноста за преголемите задолжувања на некои земји на сите земји од еврозоната. Консолидацијата на пресметките мора да биде главна задача.

„Посебно кога се работи за Италија, кажувам јасно и гласно – останете непопустлива, госпоѓо Меркел! Сега Италија е на ред и нека покаже што може“, вели Бернер.

Неизбежно: големи реформи во Италија

На италијанската влада мора да и‘ биде јасно дека без длабоки реформи нема да може да ја зајакне конкурентноста на пазарот. Што се однесува до Грција и Португалија, Бернер тврди дека самото ослободување од дел од долговите нема да ги спаси овие земји, ниту ќе им помогне повторно да станат конкурентни.

„Во случај Грција доброволно да ја напушти евро-зоната и вредноста на нејзината валута поради тоа да падне за 40 до 50 проценти, цените во Грција преку ноќ би дошле на ниво на оние во Турција“, вели тој. Со тоа оваа земја во многу економски сектори повторно би станала конкурентна и би била способна за нов почеток.

Средишна точка во борбата против должничката криза во Европа е и понатаму, според мислењето на Бернер, партнерството меѓу Германија и Франција. Овие две земји во секој случај мораат да делуваат и размислуваат заеднички. Инаку, Германија ќе се најде изолирана за петнаесетина години, што би ја чинело многу, и економски и политички.

Автор: Сабине Кинкарц / Александар Методијев

Редактор: Горан Чутаноски