Почеток на подготовките

За германските фудбалски репрезентативци почнува жешката фаза од подготовките за СП во Бразил. Тие до 31 мај се во тренинг камп во Јужен Тирол, Италија. Од 27-темина играчи кои ги избра селекторот Јоахим Лев, еден ќе пристигне дури по финалниот натпревар на Лигата на шампиони. Сами Кедира, имено, мора да биде со својот клуб Реал Мадрид до финалето в сабота во Лисабон.

Капитенот Филип Лам и голманот Мануел Нојер веќе денеска се со репрезентацијата, но засега не смеат да тренираат поради повреди. По завршувањето на кампот и тест натпреварот што ќе се одигра на 1 јуни, Лев ќе мора да го направи изборот од 23-ца играчи кои ќе отпатуваат во Бразил.

Лам на четири недели пред СП изјави дека репрезентацијата мора да работи „на одбраната“. „Во последно време примивме премногу голови, а пропуштивме многу големи шанси. Мора да внимаваме на тоа како стои одбраната“, рече Лам за весникот „Билд“. За триесетгодишниот Лам ова ќе биде трето светско првенство. Својата најверојатно последна шанса за титула тој сака да ја искористи по секоја цена: „Не сакам да испаднеме во полуфиналето или да одам во Бразил за да уживам на сонце. Имам јасна цел, а тоа е постигнување на најголемиот успех - освојување на пехарот на СП.“