160809 Wasser Stockholm

Повеќе од две милијарди луѓе во светот немаат пристап до тоалет. Тие мораат нужда да вршат на отворено, но за тоа не говори никој. Исто така не се говори ни за тоа дека водата која се загадува на тој начин, води кон ширење на заразните болести. Состојба на која Биндешвар Патај и објави војна во Индија. Социологот во 1970 година формираше организација која разви ефтини тоалети, кои не ја загадуваат животната средина, и кои жителите на сламовите во Индија можат да ги користат за навистина мал надоместок. На Светската недела во Стокхолм, на Биндешвар Патак му се оддава признание за неговата долгогодишна работа, вели Сесилија Мартинсен, директорка на конференцијата во главниот град на Шведска.

Како да се обезбеди вода за мега-градовите

Целта на Светската недела на водата оваа година е да пронајде одговори на прашањата на глобалните промени. Кон тоа припаѓаат и техничките иновации како системот тоалети на Патак но истотака и прашањето за тоа како да се оптимира односот кон водата, која се‘ повеќе недостасува. За милиони луѓе, пред се’ во Африка и во Азија, кои живеат во брзо растечките населби во мега-градовите, прашањата на функционирачка канализација и пристап до чиста вода за пиење се навистина итни:

„ Силниот пораст на населението во градовите е важна тема. Како да постапуваме со водата за пиење и со побарувачката за вода во областите со прилив на население. Истотака и промената на климата има силно влијание врз општествата, има поплави, премногу или премалку дожд. На Светската недела на водата се занимаваме со водата во една поширока перспектива, со актерите од приватниот сектор, научниците, политичарите , но и луѓето кои технички се занимаваат со прашањата за водата“ , вели Сесилија Мартинсен.

Универзална наместо национална перспектива

Посебно важна тежишна тема на конференцијата годинава се транснационалните води, за чие користење спорат повеќе земји. Реките и изворските системи не познаваат граници. Меѓународни договори за користење на тие транснационални води и за арбитража во случај на спорови меѓутоа речиси и да нема. Во Стокхолмскиот институт за вода, кој е организатор на конференцијата, Андерс Јегерског работи на модели со кои во иднина би требало да се надминуваат конфликтите за вода:

„ Ние мораме да се оттргнеме од националната перспектива и да ги гледаме на пример реките во целина. Каде е најлогично да се постави определена брана, каде има земјоделски површини. Тоа на крајот носи поголема добивка отколку постојаното пребројување, кому колку кубни метри вода му припаѓаат“, вели Јегерског.

Автор: Агнес Бириг/ Симе Недевски

Редактор: Жана Ацеска