Вереницата на Клуни одби да биде дел од комисијата на ОН за Газа

Комисијата треба да ги испитува можните злосторства извршени од двете страни за време на израелската воена офанзива во Газа. Комисијата ќе биде предводена од канадскиот професор по меѓународно право, Вилијам Шабас, а дел од неа е и експертот-ветеран на ОН за човекови права Дуду Диене од Сенегал. ОН информираа дека третиот член на тимот е Амала Аламудин, британска адвокатка со либанско потекло и вереница на холивудскиот актер Џорџ Клуни.

Преку портпаролот на актерот таа објави дека нема да биде дел од оваа комисија. На неа и’ била понудена таквата задача, но не можела да ја прифати поради други обврски.

„Ужасната сум од ситуацијата во окупираниот Појас Газа, посебно од цивилните жртви што беа направени и силно верувам дека треба да има независна истрага и одговорност за злосторствата што беа направени“, стои во изјавата на адвокатката Аламудин.

Претставништвото на ОН во Женева не можеше да даде објаснување зошто беше објавено нејзиното име, кога таа не ја прифатила задачата. Нема информација ниту кој ќе биде третиот член на тимот.

ОН соопштија дека независниот тим ќе треба да ги истражи „сите кршења на меѓународното хуманитарно право и меѓународниот закон за човекови права за време на воените операции што започнаа на 13 јуни 2014 година“.

Во едномесечниот конфликт, за време на кој беа извршени голем број израелски воздушни напади врз Газа и беа истрелани стотици ракети на Хамас кон Израел, загинаа 1.938 Палестинци и 67 Израелци, а беа разурнати голем број објекти во густо населените делови на Појасот.

Договорено е комисијата да поднесе извештај до Советот за човекови права на ОН до март следната година.