Бучковски ги слушна проблемите на Македонците во Албанија

Македонците бараат воведување факултативна настава на мајчин јазик во училиштата во кои учат нивните деца, изградба на основната инфраструктура неоходна за живот и соодветна застапеност во државната администрација на Албанија.

"Премиерот Бучковски со неговиот албански колега Фатос Нано меѓудругото разговараше и за положбата на македонското малцинство во Албанија", изјави за Дојче Веле Марјан Ѓуровски од кабинетот на Бучковски.

Официјално, според пописот од пред пет години во Албанија живеат околу 5 000 Македонци, а според македонската заедница од оваа земја меѓу 120 и 150 илјади. Најголем број од нив се од Мала Преспа, Голо Брдо, Гора, Корча, Подградец и Елбасан.

Во неможност да ги остварат своите права Македонсците во Албанија формираа партија со седиште во Тирана но нивното политичко здружение сеуште не е регистрирано. Албанија како потписник на конвенцијата за заштита на малцинствата доби забелешки од Советот на Европа во однос на имплементацијата на оваа конвенција но и покрај тоа прогрес на тој план во оваа земја сеуште нема.

И претходникот на Бучковски, актуелниот шеф на македонската држава беше во Подградец и во Мала Преспа за да се запознае со проблемите на македонците кои живеат таму. Пред околу две години Црвенковски и Нано им ветија дека ќе им биде асфалтиран локалниот пат и ќе им бидат подобрени основните услови за живот, но ветувањето сеуште не е реализирано.