Брисел праќа помош за поплавените подрачја

„Сета помош која се бараше е веќе на пат“, изјави во саботата (17.05.) гласноговорникот на Европската комисија задолжен за хуманитарна помош и реакција во вонредни ситуации Дејвид Шерок.

Во Европската комисија наведуваат дека на итното барање на Србија за помош први одговориле Германија, Бугарија, Словенија и Австрија. Набрзо им се прклучиле Чешка, Франција, Хрватска, Латвија, Литванија и Естонија, така што во саботата вечер и во текот на денешниов ден во цела Србија се очекува разместување на првите пумпи со висок капацитет, чамци за спасување и екипи специјалци од Европската унија. Истовремено во Босна и Херцеговина стигнуваат моторни чамци и хеликоптери кои ги обезбедија Словенија, Австрија, Луксембург, Велика Британија, Словачка, Белгија и Германија.

Пратките од Луксембург веќе се во регионот

Досега 14 земји членки го прифатија повикот за помош упатен од Србија и БиХ, но оваа бројка се менува секој момент. Земјите членки се јавуваат и го нудат она што можат да го обезбедат. „Во овој момент е на пат сета побарана помош. Имаме информации дека пратките од Луксембург се веќе во регионот, а најголемиот дел од помошта ќе стигне в недела (18.5.)“, изјави Шерок за ДВ.

Истовремно од ЕУ се испратени екипи стручњаци од подрачјето на цивилната заштита кои во Србија и БиХ би требало да соработуваат со локалните власти за координација и испорака на примената европска помош.

Прво итна помош, а потоа помош за санација

Одговорниот портпарол на Комисијата на ЕУ за хуманитарна помош Шерок подвлекува: „Сега е најважно што поскоро да се достави побараната помош во погодениот регион и тоа се случува во овие моменти. Потоа ќе видиме како понатаму. Постојат други средства кои тогаш ќе се применуваат. Сега е сѐ уште рано да се говори за тоа“, одговара Шерок на прашањето дали ЕУ ќе му помогне на регионот во санацијата на последиците од оваа катастрофа.

Од Брисел укажуваат на начинот на кој функционира цивилната заштита на ЕУ, која мора да ги координира сите информации, одговори и помош од 32 земји членки на овој механизам во кои се членки 28 земји на ЕУ, плус Македонија, Лихтенштајн, Норвешка и Исланд.

Покрај помошта, од ЕУ кон погодените подрачја стигнуваат и пораки за поддршка и сочуство, кои ги испрати комесарката за хуманитарна помош Кристалина Георгиева. „Би сакала да испратам мое најискрено сочуство на роднините и пријателите на оние кои исчезнаа во овие страшни поплави“.