Апел на Иванов против насилството

Претседателот на Македонија Ѓорге Иванов денеска упати апел до сите граѓани во земјата да му кажат „не“ на насилството, да не дозволат да бидат испровоцирани и да подадат рака на пријателство. Иванов во обраќањето на свеченоста по повод потпишувањето Меморандум за соработка за имплементација на проектот „Спортот како фактор за толеранција, заедништво и почитување“ уште порача дека сите што се служат со насилство и сакаат да го доведат во прашање меѓуетничкиот соживот ќе бидат соодветно казнети од системот.

„ Во нашето општество веќе нема место за поттикнување етнички судири и нетрпеливост. Сите ние со болка се сеќаваме на горчливиот вкус на конфликтите кои ни се случија пред повеќе од една деценија. Заедно го надминавме тоа, свртевме нова страница, зацртавме нов почеток“, рече Иванов.

Македонскиот претседател смета дека иако граѓаните се свесни дека иднината на земјата и иднината на децата е во соживотот и во меѓусебното почитување, за жал, деновиве продолжуваат обидите да се испровоцира нетрпеливост.

„ Граѓаните од сите етнички заедници во Република Македонија, како и со векови досега, сакаат да живеат во мир, заемно почитување и помагање. Сите што се служат со насилство, без разлика на мотивот, ќе платат скапа цена и ќе ја добијат заслужената казна од системот“, истакна претседателот Иванов.

Автор:СН/ЖА/миа

Редактор: Ж.Ацеска