Полска: Моравјецки доби мандат да формира влада

Три недели по победата на трипартискиот опозициски сојуз на парламентарните избори во Полска, претседателот Анджеј Дуда донесе контроверзна одлука  дополнително да го одложи трансферот на власта.  Шефот на државата му даде мандат на претходниот премиер Матеуш Моравјецки од национал-конзервативната ПиС да формира влада. Одлуката ја донесол „по мирна анализа и консултации“, рече Дуда во телевизискиот говор.

Претседателот, кој и самиот потекнува од  таборот на ПиС,  во Варшава објасни дека ја следи добрата парламентарна традиција, според која претставник на најсилната партија добива задача да формира влада. Овој потег може да донесе повеќе недели политичка нестабилност во Полска. Дуда претходно го одреди датумот на конститутивната седница на новиот парламент за 13 ноември - речиси еден месец по изборите.

Полската опозиција подготвува коалициски договор

На парламентарните избори на 15 октомври, либерално-конзервативната Граѓанска коалиција (КО) на Доналд Туск освои јасно мнозинство места заедно со две други опозициски партии, конзервативната Трет пат и левичарската алијанса Левица. Трите партии веќе работат на коалициски договор.

Претходната владејачка партија, ПиС,  стана најсилната политичка сила, но освои само 194 од 460 места. Се смета дека е многу малку веројатно дека таа ќе постигне парламентарно мнозинство со други партнери.

Сомнеж за тактички маневар на Анджеј Дуда

Во Полска е политички обичај, но не и услов, шефот на државата да ја додели задачата за формирање влада на претставник на партијата која станала најсилна политичка сила. Доколку неговиот предлог за кабинет не добие мнозинство во парламентот, на ред се останатите партиски пратенички групи.

По изборите, опозициските политичари во Варшава постојано изразуваа стравувања дека  претседателот би можел да ја одложи промената  за да му дозволи на ПиС да остане на власт уште еден или два месеци.