ФБИ потврди дека Трамп бил погоден од куршум

Американското Федерално истражно биро (ФБИ) соопшти дека поранешниот  претседател на САД и републикански претседателски кандидат Доналд Трамп бил застрелан во уво со куршум за време на обидот за атентат врз него на 13 јули во Пенсилванија.

ФБИ во соопштението наведува дека „она што го погодило поранешниот претседател Трамп во увото е куршум, цел или фрагментиран на помали парчиња, испукан од пушката на починатиот субјект“.

Нејаснотии и расправија

Објавата дојде два дена откако директорот на ФБИ, Кристофер Реј, рече дека не е јасно дали повредите на Трамп биле предизвикани од куршум, шрапнел или стакло. 

Поранешниот лекар на Доналд Трамп во Белата куќа, Рони Џексон, претходно ја негираше сугестијата на директорот на ФБИ дека шрапнел, а не куршум, можеби ја предизвикал повредата на десното уво на републиканскиот кандидат за време на атентатот на 13 јули во Пенсилванија.

„Нема апсолутно никакви докази дека се работи за нешто друго освен за куршум. Директорот Реј не е во право и не му доликува што било друго да сугерира“, напиша докторот.

Џексон тврди дека лекувал рани од куршуми за време на војната во Ирак и оти го следи закрепнувањето на Трамп откако бил застрелан.

Трамп: „Не, тоа беше куршум“

Доналд Трамп, исто така, го критикуваше директорот на ФБИ Кристофер Вреј поради неговата изјава.

„Не, за жал, тоа беше куршум кој го погоди моето уво и силно го погоди. Немаше стакло, немаше шрапнели. Не е ни чудо што некогаш познатото ФБИ ја изгуби довербата на Америка“, рече Трамп во четвртокот на мрежата Тру соушал.

Еден загинат во обид за атентат врз Трамп

Атентатот на поранешниот претседател го изврши Томас Метју Крукс на предизборниот митинг во градот Батлер во Пенсилванија на 13 јули.

Трамп тогаш беше ранет во десното уво, додека еден од присутните на собирот беше убиен а двајца беа ранети. Напаѓачот беше застрелан од снајперист на Тајната служба.

Трамп сега најави дека сака да се врати на местото на нападот. Тој се уште не даде никакви детали за планираниот настан во Батлер.