Нов напад врз Киев: Дрон се урнал на детско игралиште

Украинската престолнина Киев, според објавите на градските власти, во текот на изминатата ноќ повторно била нападната со повеќе руски беспилотни летала. Ненаселена зграда е оштетена во областа Соломјански, а дрво се запали во областа Свијатошински, објави градоначалникот на Киев Виталиј Кличко на Телеграм. Според него, нема загинати и повредени во нападот.

Воената администрација на главниот град на Украина, исто така, преку Телеграм објави дека делови од дрон паднале врз детско игралиште во областа Голосијевски. Пожар избувнал и во ненаселена зграда. И во овие инциденти нема жртви.

Киев јави за успешна одбрана од нападите

Непосредно пред тоа, администрацијата го предупреди населението за можни напади со беспилотни летала и го повика да остане внатре. Началникот на воената управа на Киев, Сергеј Попко, пак, изјави дека беспилотните летала навлегле во воздушниот простор над главниот град истовремено од повеќе правци.

„Сите цели, повеќе од десет беспилотни летала, беа откриени и уништени навреме“, наведе Попко на Телеграм.

И пристанишната инфраструктура во  јужниот украински  регион Одеса на Црното Море бил нападнат беспилотни летала, соопшти локалната воена администрација, наведувајќи дека нема жртви. 

„Цел на непријателот беше пристаништето и индустриската инфраструктура во регионот (Одеса). Силите за противвоздушна одбрана работеа неуморно речиси три часа“, соопшти украинската војска на Телеграм.

Беспилотните летала „Шахед“, од иранско производство, иле лансирани од Црното Море. Нападите предизвикаа пожари во индустриските и пристанишните објекти.

Во вторникот Русија јави за неколку напади со беспилотни летала, вклучително и врз главниот град Москва, окупираниот полуостров Крим и руската флота во Црното Море. Според руски извори, по вторпат е погодена висококатница во московскиот деловен кварт. Москва ја обвини Украина за нападот.