Композицијата „Звуците на Балканот“ од српскиот композитор Лазар Ѓорѓевиќ и „Фолк свита“, дело на косовскиот композитор Дринор Зимбери се дел од она што беше изведено на концертот во Приштина. Балканските елементи на двете симфонии создадоа уникатна атмосфера и дадоа шанса музика од двете етникума да се свири на иста локација.
Десар Сулејмани, директор на Младинскиот оркестар од Западен Балкан и диригент, вели:
„Oбјавивме конкурс за млади композитори од Западен Балкан, на кој победија четворица млади композитори од Северна Македонија, Косово, Србија и Албанија. Од политички и културни причини решивме (овде) да претставиме двајца композитори од Србија и Косово. Овие две дела се културни знаци на соработката што сакаме да ја постигнеме меѓу двата народа. Иако сегашната политика е спротивна на она кон што целиме.“
Оркестарот имаше двајца музичари помалку бидејќи поради визи и пасоши не добиле дозвола да дојдат на Косово. Публиката го ценеше она што го презентираше остатокот од младите музичари и ги награди со срдечен аплауз.
„Најдобриот дел од овој проект е што се среќаваме и се поврзуваме со музичари од различни земји, свириме заедно и поминуваме одлично. Композицијата 'Звуците на Балканот' е направена специјално за овој оркестар и на публиката ѝ ја покажува убавината на балканскиот ритам, балканскиот звук“, вели Богдана Меденица, музичарка од Белград
Младинскиот оркестар на Западен Балкан (WBYO) се стреми да ги обедини младите во регионот, урива бариери и промовира траен мир со опфаќање жанрови од класична до поп до рок музика и балкански ритам.
Адеса Купа, музичарка од Косово, оценува:
„Двете дела се многу добри музички и од секој аспект. Мислам дека потеклото или културата на секој автор не е важно. Овде се собравме само за една работа, а тоа е музиката.“
За оркестарот нема национални, етнички, верски и културни граници. Младите музичари се на турнеја не само на балкански, туку и неколку европски сцени.