Конгресот спречи банкрот на САД
2 јуни 2023
Американскиот Сенат во четвртокот (01.06.2023) го усвои законот, за кој компромис постигнаа претседателот Џо Бајден и републиканскиот спикер на Претставничкиот дом, Кевин Меккарти за зголемување на горната граница на американскиот долг од 31,4 милијарди долари.
Сенатот гласаше со 63 гласа „за“ и 36 „против“ законот кој во средата го усвои и Претставничкиот дом на САД, по неколкумесечни несогласувања меѓу демократите и републиканците. Министерството за финансии претходно предупреди дека нема да може да ги плати обврските доколку до 5 јуни не се усвои соодветниот закон.
Неликвидноста на најголемата светска економија можеше да предизвика глобална финансиска криза и економски пад. Поради тоа, политичкото натегање во Вашингтон предизвика вознемиреност и на берзите.
„Голема победа за американската економија и народ“
„Вечерва избегнуваме неисполнување на обврските“, рече лидерот на мнозинството во Сенатот, Чак Шумер. Пред гласањето, сенаторите отфрлија десетина амандмани, испраќајќи го до претседателот Џо Бајден нацрт-законот на потпишување пред крајниот рок.
Според новиот закон, ограничувањето на федералното задолжување ќе биде суспендирано до 1 јануари 2025 година. Претседателот на САД, Бајден ја пофали правовремената реакција на Конгресот.
„Овој договор меѓу демократите и републиканците е голема победа за нашата економија и за американскиот народ“, порача Бајден во соопштение и најави дека сака да го потпише законот што е можно поскоро, односно во текот на денешниот ден.