Избори во САД: „Сини“ градови, „црвени“ села

Во средината на ридскиот пејзаж, опкружен со шуми и полиња, се наоѓа Моргантаун, мала населба од 2.700 жители во југозападниот дел на американската сојузна држава Кентаки. За кого ќе гласа на 5-ти ноември? Човек на бензинска пумпа не мора двапати да размислува: „Доналд Трамп - кога беше претседател имав пари во џебот. Не од Џо Бајден“. И други го велат истото.

Тоа не е изненадувачки овде во Моргантаун. Во 2020 година, осум од десет гласачи во округот во кој се наоѓа Моргантаун гласаа за Трамп. Исто така и фармерот Двејн Мекини. 60-годишникот одгледува пченка и соја на своите ниви. Тешко е за земјоделец, вели тој, и се надева дека Трамп ќе победи на изборите. Администрацијата на Бајден не заврши добра работа, вели тој. Зголемени се каматните стапки и трошоците за живот. Тоа едноставно мора да се промени, вели Мекини.

Тој не ѝ верува на  Камала Харис  дека ќе ја придвижи земјата кон економски напредок. „Таа е веројатно паметна жена, но мислам дека нема поим како му е на обичниот граѓанин“, вели фармерот. Тој верува дека Харис е како многумина во Вашингтон. Тие стигнаа до врвот, а потоа заборавија од каде доаѓаат.

Кога станува збор за економијата, поголема е довербата во Трамп

Како и земјоделецот, и градоначалникот на Моргантаун се надева на победа на Трамп на изборите. Били Фелпс седи зад голема кафена маса во градското собрание - како и повеќето куќи на главната улица, зграда од црвена тула. 59-годишниот вели дека не е обожавател на екс-претседателот, Трамп е арогантен и има преголемо его.

Но сепак ќе гласа за него. Многумина во неговата заедница страдаа од превисоките цени, објаснува градоначалникот. Тој гласа за  Трамп поради неговата економска политика –  на неговата заедница ќе ѝ биде подобро со него.

Неколку згради подалеку, Кендал Ембри има своја даночна и финансиска советодавна канцеларија. Се разбира, тој повеќе му верува на  Трамп отколку на Харис  за  економските прашања, вели Ембри. Но, тој има сосема друг проблем со Демократите. Финансискиот советник има чувство дека земјата го губи моралниот компас под Демократите. А потоа објаснува што мисли: „Мојот морален компас е дека јас сум христијанин и верувам во Библијата. Ја сметам Харис за крајна левичарка. Некои случувања се застрашувачки и сметам дека сето ова движење за разбудување е смешно“.

На Ембри исто така му пречат сите прописи кои Харис сака да ги спроведе. На пример, построги закони за оружје. Праведните граѓани така ќе страдаат, криминалците вака или онака стигнуваат до оружјето, смета Ембри. Моргантаун и на овие избори ќе биде на страната на Републиканците - сѐ друго би било огромно изненадување.

Во градот доминираат други теми

Работите се сосема поинакви во Луисвил, на час и половина оддалеченост. Најголемиот град во Кентаки повторно ќе гласа за Демократите - тоа исто така се смета за прилично сигурно. Во едно кафуле во центарот на Луисвил, Силвија Гудман, репортер на јавното Радио Луисвил, зборува за нејзините искуства во земјата и во градот. Многумина во руралните средини имаат чувство дека Демократската партија не се грижи доволно за руралните средини. Кога Трамп потоа се нафрли против политичките елити во Вашингтон, тие се почувствуваа дека некој ги разбира.

Многу луѓе во Луисвил вртат со главата поради ова. Млада жена објаснува дека за неа овие избори се пред сѐ важни за правото на абортус, за правата на жените воопшто и за правата на трансродовите луѓе. Камала Харис се залага за овие права, затоа и ќе гласа за неа. За другите во центарот на Луисвил, нивниот глас за Харис е едноставно глас против Трамп. Трамп е диктатор, нарцисоиден. Еден човек на улица вели дека не го сака овој човек на функција. Сега се работи за тоа да гласаат што е можно повеќе луѓе, вели тој.

„Демократите ја поддржуваат социјалната правда“

Охрабрете ги  луѓето да гласаат -  по можност демократски. Тоа е и мисијата на малата група што се состанува оваа вечер надвор од Луисвил. Во фокусот е кампања од врата до врата - за демократот Тејлор Џоли, кој се кандидира за Претставничкиот дом на Кентаки.

Ерлен Грајс-Овенс е една од неговите поддржувачи. Поранешната социјална работничка е убедена дека Демократите прават повеќе за луѓето,  сеедно дали во Претставничкиот дом на Кентаки или во Белата куќа. „Демократите имаат програма што ја поддржува правичноста, социјалната правда и човековите права“, вели 68-годишната жена. Разликата помеѓу она за што се залагаат Демократите и Републиканците е кристално јасна.

За оваа точка, гласачите во Луисвил и Моргантаун би требало барем да се согласни. Но, се чини дека нема многу повеќе заедничко меѓу жителите на градовите и луѓето во селата.

Автор: Нина Барт, АРД