Фотографии на денот
Актуелни, занимливи, необични, прекрасни или застрашувачки. Поглед на секојдневието преку редовната #ФотографијаНаДенот на Дојче Веле на македонски јазик.
Рударот од Стонава
Рудар во текот на работата во рудникот за јаглен ЦСМ во Стонава, Чешка. Регионот околу Стонава се вбројува во најголемите наоѓалишта на јаглен во земјата и придонесува Чешка да биде трет по големите производител на јаглен во Европската Унија. Но, и во Чешка има термин за напуштање на јагленот, и тоа најдоцна до 2038 година.
Виртуелно нуркање во „Океанот - светот на чудата“
Егзотични риби, светлечки медузи: во уметничкиот центар Phoenix des Lumières во Дортмунд моментално можете да нурнете во подводниот свет на земјата - без да се навлажните. На виртуелното нуркање низ океаните, можете одблиску да ја доживеете нивната флора и фауна – таму „танцуваат" јата од риби, поминува покрај вас голема бела ајкула или одеднаш ја отвора својата огромна уста некоја чудна риба.
Тејлор Свифт овековечена на графити
Тејлор Свифт голема колку зграда! Добро, не таа самата, туку графити на кои е насликана во германскиот град Гелзенкирхен. Двајца уметници ја овековечија поп-ѕвездата на ѕид од зграда со дозвола од градот. На графитите работеа една недела. Тејлор Свифт во јули одржа три концерти во Гелзенкирхен. Градот во тоа време беше дури наречен „Свифткирхен“ и беше домаќин на голем број фанови на пејачката.
Шарената шума
Момче седи во „Шарената шума“, во селото Поиенари, во Романија. Тоа е проект на локалните уметници со кој сакаат да укажат на неконтролираната сеча на шумите. Според проценки на експертите, половина од исечените дрвја во Романија се резултат на илегална сеча.
Есенски колоритен раскош
Есенски обоените листови на овој бршлен се сончаат на утринското сонце во германската покраина Бранденбург. Метеоролозите за оваа недела предвидуваат повеќе сончеви денови, на места со магла во раните утрински часови.
Цепелин произведува енергија од ветер
Во Кина се развиени летечки турбини слични на летала кои можат ветровите на голема височина да ги претворат во електрична енергија. Цепелин исполнет со хелиум се издигна 500 метри над градот Џингмен - рекорд во висина за оваа технологија. Системот „S500", чија моќност е околу 50 КВ, е наменет да се користи, меѓу другото, во услови на катастрофи како земјотреси или поплави.
Исправен пред „ураганските“ бранови
Млад човек исправен пред огромните бранови на променадата Малекон, во Хавана, откако ураганот „Милтон“ замина во насока на Флорида, САД. Ураганот „Милтон“ не удри на копно на Куба, но сепак ја покажа својата сила. Огромните бранови вчера ги поплавија крајбрежните места, а од населението беше побарано да биде будно и да реагира соодветно на ситуацијата.
Магична јужна поларна светлина
Овој човек ја здогледал поларната светлина над езерото Елсмир, во Нов Зеланд. Поларната светлина е природна појава на светлина на небото, особено во поларните региони, предизвикана од судирот на наелектризирани честички под влијание на магнетното поле на Земјата. На северниот пол таа се нарекува аурора бореалис. Поларната светлина обично се забележува ноќе, а настанува во јоносферата.
Сувенир - парче од урнатиот мост Карола во Дрезден
По уривањето на мостот Карола во главниот град на покраината Саксонија, Дрезден, мали фрагменти од поранешната градба над реката Елба се баран сувенир и вистински продажен хит: првите камчиња со прицврстена плочка практично му биле „грабнати" од рацете, вели Торстен Дае, раководител на локална продавница за подароци и сувенири. „Побарувачката ја надминува понудата", вели Дае.
Ученици влечат авион Ербас
Можат ли 350 ученици од основно училиште, со мала помош од возрасни, со јаже да го повлечат најголемиот патнички авион? Да се повлече авион со јаже - потфат кој се чини невозможен, но се покажа дека е тешко, но можно! Тоа успеа во Токио, каде децата влечеа Ербас А380, двоспратна грдосија од 340 тони и 73 метри должина. Подвигот се случи на аеродромот во Токио, во неделата (6. октомври).
Многу жртви во поплавите во Босна и Херцеговина
Во катастрофалните поплави кои погодија делови од Босна и Херцеговина загинаа најмалку 20 луѓе, а неколку десетици се водат како исчезнати. Само во Долна Јабланица, според податоци на Министерството за внатрешни работи на Херцеговско-неретванскиот кантон, загинале 16 лица. Силен дожд и невреме предизвикаа големи поплави и одрони на подрачјето на Јабланица, Коњица, Фојница, Кисељак и Крешево.
Модерни времиња во Ватикан
Бискуп фотографира со смартфон додека папата Франциско држи миса на плоштадот Свети Петар, во Ватикан, со која е отворено 16-то Генерално собрание на Синодот. Синодот на католичката црква во Рим четири недели ќе расправа за реформи. Папата Франциско на почетокот на Генералното собрание ги повика 350-те учесници да бида отворени и да ги слушаат другите, а не да опстојуваат само на своето мислење.
Ден на германското обединување
Мирната револуција во Германија од 1989 година низ слики, прожектирани на фасада на Шверинскиот замок. Прожектирањето на сликите од настаните пред 35 години во Германија е дел од одбележувањето на 3 Октомври - Ден на германското обединување, кое почна со средби со граѓани, концерти и предавања.
Насукани чамци
Чамци насукани над песочни брегови во Бразил снимени со дрон. Чамците се насукани на песочните брегови кои се гледаат поради сушата на реката Солимоес, една од најголемите притоки на реката Амазон. Ова е најголемата суша која Бразил ја доживеал од почетокот на евиденцијата во 1950 година.
Албанските опозиционери ги запалија своите столчиња
Припадници на Националната гарда користат апарати за гаснење додека членовите на албанската опозиција ги палат своите столчиња пред парламентот во знак на протест против затворската казна за нивниот колега Ервин Салијањи. Салијањи беше прогласен за виновен за давање лажна изјава во случај со трговија со дрога, во кој се работеше за брат на пратеник од владејачката Социјалистичка партија.
Еленот од Лондон
Елен во рани утрински часови во парк во Лондон. Фотографот на агенцијата Асошиетед прес го има фатено еленот додека рика во паркот Буши, во југозападен Лондон. Елените кои се подготвени за парење вообичаено рикаат, ги тријат роговите од дрвјата и се борат едни со други.
Покриена елеганција на модната писта
Париз е во центарот на модниот свет до 1 октомври. На „Модната недела“ врвните дизајнери ги претставуваат своите колекции за сезоната пролет/лето 2025. Секогаш присутни: необични дизајни како овој од „Исеј Мијаке“. Јапонецот чие име го носи модниот бренд, познат по иновативните техники на ткаенина, за жал повеќе не можеше да го види настапот на моделите на модната писта - тој почина во 2022.
Кинеска зелена панда
Пандите уживаат големи симпатии во Кина, па стануваат мотиви и во градините, како оваа џиновска панда од зеленило. Џиновската панда, уметничка креација од зеленило и грмушки, е висока 10 метри и се наоѓа во Хангџоу, во кинеската провинција Џеѓианг. Ја карактеризира употреба на повеќе слоеви зеленило и е атракција за посетителите на паркот.
Октоберфест во Минхен – пиво и забава
Во Минхен е во тек Октоберфест: течат потоци пиво, а составен дел на забавата е и каруселот, за оние на кои не им се врти веќе во главата од алкохол. 189. Октоберфест се одржува од 21 септември до 6 октомври 2024. На многумина цените годинава можеби малку им го расипуваат расположението и им изгледаат прилично „солени“ – кригла пиво на пример чини меѓу 13,60 и 15,30 евра.