Ерупција на вулкан: Црвен аларм за воздухополовството

Вулканот Шивелуч на полуостровот Камчатка на далечниот исток на Русија еруптираше рано утрината, околу 6:30 по локално време, исфрлајќи облак од пепел висок 10 километри, што претставува зголемена закана за воздушниот сообраќај, соопшти Тимот за одговор на вулканска ерупција на Камчатка (КВЕРТ).

Тимот издаде црвен аларм истакнувајќи дека „голем облак од пепел“ патува западно од вулканот и дека во секое време може да се случи експлозија со исфрлање пепел висока до 15 километри.

„Тековната активност би можела да влијае на меѓународните летови и на авионите кои летаат на пониски височини“, велат од КВЕРТ.

Локалните власти ги затворија училиштата и им наредија на жителите од околните села да останат дома, бидејќи облакот од пепел може да се прошири на десетици километри околу вулканот, објави на Телеграм лидерот на Уст-Камчатка, Олег Бондаренко.

Еден од најголемите и најактивните вулкани на Камчатка, Шивелуч има околу 60 значајни ерупции во последните 10.000 години, а последната голема се случи во 2007 година.

Бондаренко рече дека вулканот еруптирал во 6 часот и 31 минута по локално време, а облакот се проширил во селата оддалечени повеќе од 70 километри.

„На жителите им се препорачува да останат дома и да избегнуваат непотребни патувања“, нагласи тој.