Булингот зема замав во основните училишта

Булингот зема замав во основните училишта, при што не се поштедени ниту децата од второ и трето одделение низ училиштата во Македонија. До канцеларијата на Народниот правобранител годинава пристигнале 30-тина претставки за врсничко насилство. Состојбата секоја година се влошува, а особено загрижувачки е што повеќе инциденти има меѓу основците, отколку во средните училишта. 

Васка Бајрамовска-Мустафа, државен советник во канцеларијата на Народниот правобранител, вели дека при посети на училиштата и во разговор со ученици, нивните тимови констатирале дека врсничкото насилство често се користи како алатка за прикажување моќ или доминација на некои деца меѓу нивните соученици. 

Повлечените деца - најчести жртви 

„Како жртви секогаш се јавуваат или послабите деца, децата кои се поповлечени, многу често децата со попреченост или децата кои потекнуваат од многу посиромашни или недоволно едуцирани семејства“, вели таа.

Податоците покажуваат дека состојбата е иста, ако не и полоша за разлика од претходната година.   „Претставките што ги добиваме покажуваат дека, за жал, врсничкото насилство сѐ уште е присутно и тоа особено во училиштата, а го има и надвор, во парковите. Наместо другарување, користиме насилство“, потенцира Васка Бајрамовска-Мустафа. 

Во пресрет на Светскиот ден на детето – 20 Ноември, Народниот правобранител (НП) ја најави претстојната кампања за подигнување на свеста за промовирање на правата на децата и нивна заштита од насилство, вклучително и од врсничкото.

Нивната порака е дека мора да се укаже на штетните последици од врсничкото насилство и децата од мали нозе мора да се воспитаат и едуцираат дека конфликтите се решаваат преку дијалог, а не со употреба на сила.