Хунтелар херој на Холандија

Фудбалерите на Холандија изборија пласман во четвртфиналето на Светското првенство, откако со голот на Хунтелар од пенал, постигнат во 94.минута, го елиминираа Мексико.

Мексиканците беа поактивни и подобри во првото полувреме кое заврши без голови, додека играта и тактичката поставеност на Ван Гал се растури уште во деветтата минута, кога Де Јонг поради повреда го заврши мечот.

Мексико стигна до предност во 48.минута од натпреварот со голот на Дос Сантос. Цели 40 минути Мексиканците ја одржуваа предноста, кога во 88.минута резервистот Хунтелар му асистираше на Снајдер, кој со силен удар го совлада Очоа.

Во 94. минута Робен успеа да изнуди пенал. Одговорноста ја презеде Хунтелар кој ја одведе својата репрезентација во четвртфиналето.

Во вториот осминафинален меч се сретнаа Костарика и Грција. Репрезентацијата на Костарика се пласира во четвртфиналето на Светското првенство по изведувањето пенали.

По регуларните 90 минути резултатот беше 1:1, тој не се промени ниту по дополнителните 30 минути игра, а по изведувањето на пенали Костарика ја совлада Грција со 5:3.

Во четвртфиналето на 5. јули Костарика ќе игра со Холандија, а Бразил со Колумбија.

За преостанатите четири места конкурираат осум селекции. Третата четвртфинална двојка ќе биде позната денеска (30.06), кога осминафиналните натпревари ќе ги одиграат Франција и Нигерија, односно Германија и Алжир.