Професија од соништата - тестирање чоколада

Тоа не се едноставни чоколадни бонбони. Тие имаат имиња како „Меко срце“ или „Љубомора“. Слатка павлака со темјан и портокал завиткана со најквалитетна чоколада со какао од Мадагаскар. Бонбоните од марципан се со ф’стаци.

Тоа се омилените чоколадни бонбони на Георг Бернардини. Чоколадата е пасија на човекот со германско-италијанско потекло.

„Уште од детството сакам слатки. Потоа се школував за слаткар и така потоа страста за чоколада си се разви“, објаснува љубителот на чоколади Георг Бернардини.

Од оваа страст тој истовремено направил повеќе професии. Најпрво тој бил слаткар и произведувач на чоколада, а сега тестира чоколада. Затоа во моментов е на пат во Брисел - главниот град на чоколадата во Европа. Неговата првична цел е продавницата на Пјер Марколини. Тука има чоколадни бонбони од 7 евра за 100 грама. Се ветува единствен вкус. А, што вели експертот?

„Многу добро!“

Значаен е видот на употребеното какао

Важно е секоја фаза на вкус точно да се анализира.

„Секогаш зависи од тоа какво какао е користено. Но, често на почетокот е чоколаден вкусот, а при голтнување се појавува карактерот на какаото. Во случајов тоа беше какао од Мадагаскар. Тоа значи дека беше многу чоколадно на почеток, а од средината кон крајот тоа беше овошно“, вели Бернардини.

Георг Бернардини ги собра своите знаења и искуства во една книга. За тоа тој тестираше и оценуваше 2.700 чоколадa и чоколадни бонбони од 38 земји.

„Најважен критериум беше вкусот со 35 проценти, потоа состојките со 30 проценти и аромата со 25 проценти“, објаснува оценувачот на чоколади Георг Бернардини.

Неговото дело е означено како „Библија за чоколадата“ од страна на критичарите на специјализирани книги. На првите стотина страници тој разјаснува како и каде се одгледува какаото во Јужна Америка и Африка, и како подоцна од тоа се произведуваат нугат, слатки и чоколада.

За лошo чоколадo - евтини состојки и лош рецепт

Во главниот дел е - тестот. Производители со или без познато име се претставени со своите продукти. Потоа следува детална проценка заедно со оценка. Шест какао зрна означуваат - „задолжително да се проба“. Меѓутоа, многу продукти не добиваат ниту едно зрно.

„Лошo чоколадo за мене е она коe е произведенo без страст, каде што се работи за максимирање на профитот. Тоа подразбира користење на ниско квалитетни суровини или лоши рецепти“, објаснува Бернардини.

Тој знае од сопствено искуство како да се произведе добрo чоколадo . Бернардини има работено како слаткар во врвни европски ресторани и раководел со сопствена работилница за чоколада во близина на Бон.

Во Јапонија - чоколада со колаген

„Најчудното чоколадо што сум ја пробал доаѓа од Јапонија. Тоа е чоколадо со колаген. Тоа содржи 500 милиграми колаген на 40 грама чоколада. Јапонските жени се заколнати во него и го купуваат, бидејќи мислат дека тоа би било добро за нивната убавина“, објаснува Бернардини.

Георг Бернардини е повторно на пат низ Брисел. Следната станица му е продавницата на Патрик Роже. И тој се наоѓа на листата на најдобрите составена од тестирачот на чоколада.

„На првото место е ’Домори’ од Италија, најдобриот производител на чоколада во светот. Патрик Роже од Франција е најдобриот производител на чоколадни бонбони во светот. Тука е и Пиер Марколини од Белгија и ’Цотер’ од Австрија“, вели Бернардини.

Поради своите тестови, тој годишно јаде по 36 килограми чоколада. И покрај тоа, тој успева да ја задржи тежината.

„Спортот е суштинска работа. Секако, истовремено треба генерално да се обрне внимание на навиките во исхраната. Но, за да се компензира поголемото конзумирање на чоколада мора да се вежба некој спорт“, вели Бернардини.

Денеска Георг Бернардини уште еднаш си ги дозволува своите омилени чоколадни бонбони - од висококвалитетен марципан со италијански ф’стаци.