Писмо-бомба експлодираше во Париз

Во експлозијата која се случи денеска во канцелариите на Меѓународниот монетарен фонд во Париз е повредено едно лице. Асистентка на еден раководител на ММФ има повреди на лицето и на рацете. Со повреди се здобила во обид да го отвори писмото, јавуваат агенциите повикувајќи се на извори во француската полиција. Повеќемина вработени во ММФ се евакуирани од зградата како мерка на претпазливот. Кој е испраќач на писмото сѐ уште не е познато.

Инцидентот во Париз се случува еден ден по откривањето на пакетот-бомба во поштенскиот оддел во германското Министерство за финансии во Берлин. Според надлежните, во пакетот имало мешавина од експлозивни супстанци и фитил. Во Берлин немаше повредени. Одговорноста за пакетот-бомба ја презеде грчка екстремно левичарска група. Грчката полиција денеска оцени дека смета оти пораката со која анархистите преземаат одговорност, а која е објавена на левичарската интернет-платформа Индимедиа, може да се смета за веродостојна. Групата која дејствува од 2008 година под името „Заговор на огнените ќелии“ е одговорна за десетици напади со потпалување или пакети-бомби, во кои досега немало жртви. Испраќањето на пакетот во германското Министерство за финансии е акција во рамките на проектот насочен против „системот на моќ“, се вели во пораката на екстремните левичари.