Ослободени воените набљудувачи на ОБСЕ

Специјалниот руски пратеник Владимир Лукин денеска пред новинарите во Славјанск соопшти дека набљудувачите на ОБСЕ кои пред осум дена беа заробени од страна на проруските активисти во Славјанск се ослободени. „Сите 12 набљудувачи кои стојат на мојат листа се ослободени“, изјави Лукин. Покрај осумте европски воени набљудувачи , меѓу нив и четири Германци, милициите во Славјанск имаа заробено и четворица украински офицери. Лидерот на проруските милиции во Славјанск Вјачеслав Пономарјов потврди дека набљудувачите се ослободени и истакна дека не биле поставени никакви услови за нивно ослободување. „Како што им ветив на набљудувачите, вчера го прославивме мојот роденден и тие заминаа. Како што реков, тие беа мои гости“, изјави самопрогласениот градоначалник на Славјанск, Пономарјов. Тој претходно набљудувачите на ОБСЕ ги означуваше како „НАТО шпиони“ и „воени заробеници“. Проруските активисти првобитно планираа во замена за ослободување на заложниците да издејствуваат пуштање на слобода на заробени проруски борци.

Германската влада и Европската унија во изминатите денови постојано апелираа до рускиот претседател Владимир Путин да изврши притисок врз проруските сепаратисти во Славјанск да ги ослободат заложниците.

.