Македонија и Албанија на ист пат-кон ЕУ

Арифи и Топали разговараа за европските перспективи на двете земји, при што заклучија дека европската интеграција на Македонија и на Албанија, но и на другите држави од регионот, е значајна за натамошниот напредок на целиот регион.

Вицепремиерот Арифи се осврна на конкретните реформи од европската агенда кои се спроведуваат во Македонија, особено во петте области опфатени со Пристапниот дијалог на високо ниво.

Република Албанија ја поддржува интеграцијата на Македонија во евроатлантските структури, рече Топали, потенцирајќи дека градењето на добрососедските односи е значаен елемент кој оди во прилог на европската интеграција.

Двете соговорнички оценија дека постои одлична соработка меѓу Македонија и Албанија и разменија мислења околу можностите за нејзино унапредување преку размена на искуства и учество во заеднички проекти и иницијативи. Во тој контекст беше нагласена потребата максимално да се користат можностите што ги нуди Инструментот за претпристапна помош – ИПА, особено компонентата за прекугранична соработка, соопшти Секретаријатот за европски прашања во Скопје.