Кој е највисокиот олимпиец, кој најмладиот, а кој најстариот?

Благодарение на дебитантското дуо Ернст и Зајдел германската олимписка делегација ќе биде во првите редови уште пред почетокот на 22. Зимски олимписки игри во Сочи. Џанина Ернст, која ќе се натпреварува во скијачки скокови, и Ана Зајдел од Дрезден, која ќе се натпреварува во дисциплината лизгање на куси патеки, се заслужни за тоа.

Ернст, која е родена Швајцарка и која од јуни мината година настапува за Германија, има само 15 години и еден месец и е најмладата учесничка на ЗОИ на Црното Море. Зајдел, пак, која учи во спортска гимназија, заедно со австриската натпреварувачка во скијачки скокови Киара Хелцл и украинскиот фри-стајлер Александер Окипњук се најлесните спортисти учесници на Олимпијадата со само 43 килограми.

Најмлад машки спортист, кој ќе настапи во Сочи, е јапонскиот сноубордер Ајуму Хирано, кој има 15 години и два месеци. Тој на 11. февруари во т.н. Halfpipe ќе го предизвика трикратниот олимписки првак, американската суперѕвезда Шон Вајт.

Од ваквите спортски сфери многу оддалечен е „метузалемот“ на Игрите. Хубертус цу Хоенлое, кој во неделата го прослави својот 55 роденден, целосно го исполнува мотото - „ најважно е да се учествува“. Хубертус цу Хоенлое, кој е роден во Мексико, по шести пат ќе учествува на Зимски олимписки игри и се смета за егзотичен спортист. Најстариот Германец кој учествува во Сочи е Јон Јар, кој настапува во карлинг.

Највисокиот на Игрите истовремено е и најтшкиот спортист. Словачката ѕвезда во хокеј на мраз Здено Хара е висок 2,06 метри и тежок 117 килограми. Тој е цели 60 сантиметри повисок од „џуџињата“ на ЗОИ, јапонскиот натпреварувач во скијачки скокови Наруми Такахаши и Канаѓанецот Лиам Фирус, наптреварувач во уметничко лизгање. Тие се високи само 1,46 м.