Израел нападна ирански единици во Сирија

Израелските воздухопловни сили во текот на ноќта бомбардираа бројни ирански цели во соседна Сирија. Според различни извештаи, во бомбардирањето загинале најмалку 11 лица. Ова е најсериозен израелски воздушен напад во Сирија досега, објави израелската телевизија. Бомбардирањето било реакција на  ракетниот напад на иранските бригади Ал-Кудс врз Голанската висорамнина, под окупација на Израел.

Складишта за оружје на бригадите на Ал-Кудс

Израелските сили објавија дека нападнати биле цели поврзани со бригадите на Ал-Кудс и со сириската армија. Меѓу нив биле неколку складишта за оружје и објект на меѓународниот аеродром Дамаск, како и цел поврзана со иранската разузнавачка служба и ирански камп за обука. Бригадите на Ал-Кудс се елитна единица на Иранската револуционерна гарда и главно се користат за ангажмани во странство.

Во неделата израелската ракетна одбрана пресретнала проектил истрелан од бригадите Ал-Кудс врз Голанската висорамнина. Израелски посетители на скијачкиот центар Хермон сведочеа за инцидентот. Денеска центарот треба да остане затворен, со оглед на напрегнатата ситуација. Претходно, израелските борбени авиони испукаа повеќе проектили врз аеродромот во Дамаск, кои, меѓутоа, биле пресретнати од страна на сириската противвоздушна одбрана.

Повеќе на темата:

-Иран демантира напади врз Израел

-Израел нападна ирански позиции во Сирија

Според државната сириска новинска агенција Сана, противвоздушната одбрана исто така била активна и во текот на ноќта. Израелските вооружени сили соопштија дека Сирија испукала десетици противвоздушни проектили, и покрај „јасните предупредувања од израелска страна да се воздржи од таков оган“. Како одговор, израелските воздухопловни сили, исто така, нападнаа неколку одбранбени батерии на сириските вооружени сили.