Дајмлер не знае од каде му е автомобилот на Ким

Ким изненади многумина користејќи специјални лимузини на Дајмлер на неколку настани, вклучително и на последниот со рускиот претседател Владимир Путин, како и на претходните самити со Доналд Трамп.
Продажбата на луксузни стоки, вклучително и лимузини, е забрането согласно санкциите на ОН против Северна Кореја, чија цел е да се натера комунистичката земја да ја напушти својата нуклеарна програма.

Но, Ким го чекаа две лимузини на станицата во Владивосток- Мерцедес Мајбах С600 Пулман и Мерцедес Мајбах С62. На претходните самити со Трамп тој користеше Мајбах Пулман.

„Немаме воопшто идеја како тие возила биле испорачани во Северна Кореја“, вели портпаролот на Дајмлер Силке Мокерт во пишана изјава до Асосиејтед Прес. „За Дајмлер, правилниот извоз на производите во согласност со законите е фундаментален принцип на одговорно работење“.

Дајмлер, со седиште во Штутгарт, Германија, е еден од најгопемите и најпрестижни светски производители на автомобили. На својата интернет-страница, мултинационалната компанија се фали дека продава возила во речиси сите светски држави, а има производни единици во Европа, Северна и Јужна Америка, Азија и Африка.

Но, Северна Кореја, не е официјален муштерија.

„Нашата компанија немала бизнис соработка со Северна Кореја повеќе од 15 години, и стриктно се придржува кон ембаргото на ЕУ и САД“, вели портпаролката Мокерт. „За да се спречи испорака во Северна Кореја и во нејзините амбасади, Дајмлер воведе сеопфатен процес на контрола на извозот. Продажбата на возилата од трети страни, особено на користени возила, е надвор од наша контрола и одговорност“.
Способноста на Ким да стигне до лимузината е добар пример за порозноста на меѓународните санкции. Се верува дека моделот во кој се вози Ким е опремен со најсовремени системи за комуникација и забава.