Големо славје во германските градови

Повеќе од 250 илјади луѓе го следеа финалниот меч на Светското првенство во фудбал на платото пред Бранденбуршката порта во Берлин, а потоа ја прославија и големата победа на германската репрезентација.

Навивачите сместени во „фан зоната“ бурно го прославија голот на Марио Геце во 113. минута, со кој Германија ја совлада Аргентина со 1:0.

Од вревата по постигнатиот гол не можеше да се слушне ни коментаторот од големиот видео-бим поставен на платото. Кога капитенот Филип Лам го подигна трофејот, беше испукан голем огномет околу платото, каде навивачите почнаа да се собираат дури шест часа пред почетокот на мечот.

Ниту дождот и грмотевиците не ги спречија навивачите да ја слават титулата до рано утрово.

Титулата беше прославувана во речиси сите германски градови, и покрај силното невреме кое зафати делови од земјата.

Околу 50 илјади луѓе го следеа мечот на стадионот на Сенкт Паули во Хамбург, додека навивачите на Унион во Берлин на својот стадион си донесоа кревети и фотелји за поудобно да го следат финалето.

На другиот крај на светот, во Буенос Аирес, дел од разочараните навивачи го истурија својот гнев поради поразот на аргентинската репрезентација врз полицијата и околните објекти во центарот на градот. Најмалку 15 полицајци се повредени во немирите, а уапсени се повеќе од 40 лица. Група навивачи, незадоволни од резултатот и под дејство на алкохол, започнале да кршат сѐ пред себе. Тие се судриле со полицијата, која морала да употреби солзавец и водени топови.