Белгија и Аргентина во четвртфиналето на Мундијалот

Аргентина е седмата репрезентација која обезбеди пласман во четвртфиналето на Светското фудбалско првенство во Бразил.

На осминафиналниот меч на Мундијалот одигран во Сао Пауло, Аргентина ја совлада Швајцарија со 1:0 дури по продолжението откако натпреварот во регуларните 90-минути заврши без голови. Стрелец на победничкиот гол за „Гаучосите“ беше Анхел ди Марија во 118-минута.

Противник на Аргентина во четвртфиналето е Белгија. Белгиските фудбалери во вечерниот натпревар против САД и германскиот тренер Јурген Клинсман извојуваа победа во продолжението од мечот.

Останатите три четвртфинални парови се: Бразил – Колумбија, Холандија - Костарика и Франција – Германија.

Денеска и утре на првенството е слободен ден, а натпреварите за влез меѓу четирите најдобри ќе се играат во петок и сабота.