An hallaka soja hudu a yankin Diffa

A wata sanarwar da ta fitar a yammacin jiya Lahadi, ma'aikatar tsaron kasar Nijar ta ce ko baya ga mutuwar sojojin hudu, tagwayen hare-haren kan mashigar sojanta da ke N'Gagam da PK5 a gundumar Diffa, sun raunata wasu soja shida a yayin da kawo yanzu wani daya sojan ya yi batan dabo.

Sai dai sanarwar ta kuma kara da cewa askarawan sojan kasar, sun yi nasarar hallaka mayakan da dama tare da lalata manyan muggan makamai ta hanyar luguden wuta ta sama.

Wannan harin dai na zaman irinsa na farko kenan da mayakan 'yan ta'adda suka kaddamar a kasar, jim kadan bayan karbar rantsuwar fara aiki da sabon shugaban kasar Mohamed Bazoum ya yi a karshen makon jiya.