Mandela yayi bukin cika shekaru 88 da haihuwa

A yau tsohon shugaban ATK Nelson Mandela ya cika shekaru 88 da haihuwa, a wani kwarkwaryar biki da yayi da iyalensa. Dukkan ´yan kasar ta ATK sun aikewa tsohon shugaban kuma gwarzo na yaki da mulkin nuna wariya sakon taya murna. Mandela wanda a hukumance yayi ritaya a shekara ta 2004 ya yi bukin ne a yau tare da dukkan danginsa a gidansu na gado da ke Qunu a can cikin lardin gabashin Cape. A cikin wata sanarwa da ya bayar shugaba Thabo Mbeki wanda ya gaji Mandela a shekarar 1999, ya yi fatan cewa Mandela wanda ake yiwa lakabi da Tata ko kuma Kaka a fadin ATK, zai tsawon rai don ya shaida yadda kasar zata bunkasa. A yau din ne kuma Mandela yayi bukin zagayowar shekara 3 da auren matarsa ta 3 Garcia Machel.