Jikin Nelson Mandela ya kara yin tsanani

A ranar Lahadi ce dai fadar gwamnatin Afirka ta Kudun ta bada wannan labarin inda kakakin gwamnatin kasar Mac Mahraj ya ce shugaba Jacob Zuma ya bukaci al'ummar kasar da su sanya Mandela cikin addu'o'insu daidai lokacin da Mr. Zuma ya zayarci dattijon a asibiti, inda ya kara da cewar likitoci na ta bakin kokarinsu wajen ganin ya samu lafiya.

Tuni dai iyalansa musamman ma dai 'ya'yansa da kuma tsohuwar mai dakinsa Winnie Mandela suka je asibitin domin kasancewa da tsohon dan gwagwarmaya da wariyar launin fatar dan shekaru casa'in da hudu da haihuwa, yayin da al'ummar kasar ke ci gaba da nuna alhinunsu dangane da halin da Mandelan ke ciki.

A kwanaki sha bakwai din da suka gabata ne dai aka sake kwantar da Mandela bayan da cutar huhun da yake fama da ita ta ta'azzara.

Mawallafi: Ahmed Salisu
Edita: Mohammad Nasiru Awal