تاجیکستان امنیت مرز خود با افغانستان را تقویت می‌کند

سرگئی لاوروف، وزیر امور خارجه روسیه، امروز چهارشنبه ضمن دیدار از تاجیکستان تعهد کرده است که از این کشور در ایجاد یک پسته مرزی حمایت مالی می‌کند. تاجیکستان در نظر دارد که همزمان با خروج نیروهای خارجی از افغانستان یک پسته مرزی مدرن در مرز با افغانستان ایجاد کند.

لاوروف به خبرگزاری رسمی روسی «تاس» گفته است که همچنان سربازان روسی مشترکاً با نظامیان تاجیکستان تمریناتی را به هدف مبارزه با تروریسم انجام می‌دهند. او در عین زمان حمایت‌های بیشتر را به تاجیکستان وعده داده است.

قبل از این ولادیمیر پوتین، رئیس جمهور روسیه، نیز گفته بود که به هدف حفظ ثبات منطقه پایگاه‌های نظامی روسی را در تاجیکستان تقویت می‌کند.

لاوروف گفته است که مسکو از فعالیت‌های شبه نظامیان در شمال افغانستان نگران است.

تاجیکستان، جمهوری سابق اتحاد جماهیر شوروی پیشین، نیز نگران است که گسترش نیروهای افراطی در افغانستان امنیت این کشور را تهدید خواهد کرد و احتمال این می‌رود که دامنه این تهدیدات از کشورهای آسیای مرکزی تا روسیه گسترش یابد.

روسیه یکی از حامیان مذاکرات صلح میان حکومت افغانستان و طالبان است که در حال حاضر با بن بست مواجه گردیده است. 

امریکا و ناتو پس از ۲۰ سال مأموریت در افغانستان روند خروج سربازان خود را آغاز کرده اند و این نگرانی وجود دارد که در صورت عدم موفقیت مذاکرات صلح، گروه‌های افراطی تقویت گردند.

قبل از این در دهه ۱۹۹۰ یک جنگ داخلی میان حکومت تاجیکستان و اسلامگرایان افراطی این کشور صورت گرفت و در آن زمان افغانستان برای این جنگجویان تاجیکستان یک منطقه عقب‌نشینی بود.

nf/af (dpa)